Inwoners moedeloos oor lekkende pyp vanaf November

Mnr. Viki Mtima is raadop met die water wat vanaf verlede November deur sy erf in Prevetstraat stroom.

Inwoners van Prevetstraat is raadop met water wat steeds deur hulle erwe stroom.

Volgens mnr. Viki Mtima stroom die water al vanaf verlede November deur sy erf.

Die water spoel nou ook deur drie ander erwe wat langs mnr. Mtima se woning geleë is.

Die inwoners het klaarblyklik die lekkende water telkemale sonder sukses by die Lekwa Munisipaliteit aangemeld.

Die munisipaliteit het wel in Januarie en Februarie opgedaag en gepoog om ’n pyp wat deel is van die hoofwaterlyn na Early Bird Farm te herstel.

Na bewering deur een van die inwoners het Early Bird ’n nuwe pyp gekoop om die herstelwerk te doen.

Die poging was onsuksesvol en die gat wat deur die munisipaliteit gegrawe is, is net so oopgelaat nadat hulle daar gewerk het.

Daar blyk twee groot lekke te wees.

Die lek by die Baumann- en Kameeldoornstraat-kruising het ’n slaggat gekolk waarin reeds ’n motor en ’n bus vasgesit het.

Die ander lek is waar die munispaliteit gepoog het om die stukkende pyp te herstel, maar die water stroom nou erger as tevore daar uit.

Mnr. Sam Mthetwa, bourekenaar, het gesê die nattigheid kan die fondasie en die struktuur van die huis verswak wat later tot ineenstorting kan lei.

Hy het voorgestel dat die inwoners ’n loodgieter ontbied en die rekening aan die munisipaliteit stuur.

Die Standerton Advertiser het ’n e-pos aan me. Thobeka Mtshiselwa, woordvoerder van die Lekwa Munisipaliteit, gestuur om navraag te doen oor waarom die pyp nie herstel word nie, maar het nog geen terugvoer ontvang nie.

Luister gerus na ’n video-opname van mnr. Viki Mtima op ons webwerf.

  AUTHOR
Antonette Keyter
Reporter

Latest News

COMMENTS

Top